हिंगोली : आई-वडिलांचे भांडण सोडविण्यासाठी गेलेल्या दहा वर्षीय मुलीच्या डोक्यात लोखंडी गजाचा मार बसल्याने तिचा मृत्यू झाला. तर आई गंभीर जखमी झाली. सेनगाव तालुक्यातील सवना येथे बुधवारी पहाटे ही घटना घडली. वैष्णवी विनोद भालेराव असे मृत मुलीचे तर रत्नमाला भालेराव असे जखमी आईचे नाव आहे.

सवना येथील विनोद भालेराव याचा त्याची पत्नी रत्नमालाशी मंगळवारी रात्री झालेला वाद विकोपाला गेला. यामध्ये विनोदने रागाच्या भरात लोखंडी गजाने रत्नमालाच्या डोक्यात वार केला. मात्र, त्यांच्या तोंडावर वार लागला. त्यामध्ये त्यांच्या ओठाला गंभीर दुखापत झाली. त्यांच्या भांडणाचा आवाज ऐकून वैष्णवी हिला जागी आली. तिने आई-वडिलांचे भांडण सोडविण्याचा प्रयत्न केला. मात्र, रागात असलेल्या विनोदने वैष्णवीच्याही डोक्यात लोखंडी गजाचा वार केला. यामध्ये तिच्या डोक्याला गंभीर दुखापत झाली. ते पाहून घाबरलेल्या विनोदने शेजाऱ्यांच्या मदतीने तिला उपचारासाठी सवना येथील खासगी रुग्णालयात नेले. तेथे प्राथमिक उपचार करून पुढील उपचारासाठी हिंगोली येथील शासकीय रुग्णालयात दाखल केले. मात्र, तेथे वैद्यकीय अधिकाऱ्यांनी वैष्णवीला मृत घोषित केले.